السلام عليكم
قبل امس كان يوم المرأة العالمي .. وبهذي المناسبة فكرت اني اسوي سلسلة تدوينات جديدة
عن المرأة ونساء غيرو العالم من جد في اي مجال كان سواءً في السياسة او الاختراعات
او حتى انهم سوو شي غير معتقد الناس من بعدهم .. هذا وبحكم اني انثى وولدتني اعظم امرأة
في العالم ( على الاقل بنظري ) .. هذي المرأه خلتنا نفتخر وين ما نكون اننا بناتها واننا بنات .. وسوت كل
اللي كان باستطاعتها عشان توفر لنا كل شي نبيه سواءً من ناحية المعيشه او التربية او اي شي ثاني
كانت قوية وعلمتنا كيف نكون اقوياء ونعتمد على انفسنا .. لو بدور اكثر كلمة توصفني وافتخر فيها
بقول اني بنت هَيَا :) .
الزبدة p: بسمي هذي السلسلة
We Can Do It
هذي السلسلة مو معناها اني اقلل من احد بس لان للاسف فيه الى الان نساء اذا جو يبون
يشتغلون او يتخصصون في المجال اللي يبونه اكثر كلمة تقابلهم .. ايش تبون بهذا المجال هذي شغلة رجال !!
( لحد ينكر وجود هذي النوعية للاسف الشديد انها موجودة وما يعتبرون من الاقليه )
وممكن تكون انثى تقول هذا الكلام لانثى ثانية !! .. انا هنا صراحة ما اقدر اقول شي غير الله يعينها
على نفسها .. مو معقول انك تشوفين نفسك ناقصة او ان في اي احد احسن منك الانتاجية
مو مختصه بجنس محدد او انهم قادرين عليها هي قدرات وميول ربي حطه في كل انسان واذا
كنت حابب شغلة اكيد راح تبدع فيها .
وللي يقول ان اغلب المخترعين والمشاهير اللي غيروا العالم هم رجال .. بقول ايوه صح
بس لازم ناخذ بعين الاعتبار ان رجال من اول الخليقة وهم لهم كل حقوقهم لكن المرأة عانت
من نظرات دونيه لها وللاشياء اللي هي قادرة تسويها .. وغير كذا فيه نساء كثيرات غيرو العالم
لكن للاسف محد يعرف عنهم كثير .
كثير يتهمون المرأة انها تافهه مجرد انها تهتم بالموضة وملابس وميك اب والخ .. بعكس الرجل
اللي يعطي اهتمام اقل بهذي المسائل .. احنا كذا ربي خلقنا كذا نهتم في نفسنا لانها جزء
من انوثتنا بعكس الرجل اللي الرجولة لها معايير غير المظهر الخارجي .. وغير كذا الرجال
يحسون بهذي المشاعر اتجاه الفاشن بس لانها ما تهمهم .. في المقابل الرجل عنده اهتمامات
ثانية المرأة تشوفها تافهة .. مثل الكورة انا عن نفسي اشوفها تافهة واقدر اعبر عنها بانها
- مجموعة شباب يلاحقون كورة - لكن ما صجينا روسكم فيها لاننا نعرف انها مو من اهتماماتنا
بس ما ننسى ان فيه رجال يهتمون ويحبون الموضة وفي نساء يحبون الكورة .. هذا اكبر دليل
انها مجرد اهتمامات مالها علاقة بتفكيرك .
وفي النهاية حبيت اقول للي الى الان يقارنون الرجل بالمرأة
ترانا في ٢٠١٥
Good bye, and good luck
* اخذت اسم السلسلة من البوستر المشهور اللي نزل ايام الحرب العالمية .. هذا البوستر سووه
عام ١٩٤٣م لشركة Westinghouse وهي كانت شركة تعمل في الكهرباء .. وسوو هذا البوستر
عشان يحفزون عاملاتهم ما كان البوستر مره مشهور ايام الحرب العالمية الثانية لكن رجع واشتهر
في بداية الثمانينات واستخدم لنصرة المرأه .. هو مشهور باسم we can do it لكن هو له اسم
ثاني هو Rosie the Riveter .. فكرة البوستر ببساطة ان ممكن تكونين قوية وهذا الشي
ماراح يأثر على انوثتك .. يقولون ان من الممكن الصورة تكون للعاملة Geraldine Hoff بس
مو اكيد .. هذي هي صورتها .
ليست هناك تعليقات:
إرسال تعليق