السلام عليكم
قبل امس كان يوم المرأة العالمي .. وبهذي المناسبة فكرت اني اسوي سلسلة تدوينات جديدة
عن المرأة ونساء غيرو العالم من جد في اي مجال كان سواءً في السياسة او الاختراعات
او حتى انهم سوو شي غير معتقد الناس من بعدهم .. هذا وبحكم اني انثى وولدتني اعظم امرأة
في العالم ( على الاقل بنظري ) .. هذي المرأه خلتنا نفتخر وين ما نكون اننا بناتها واننا بنات .. وسوت كل
اللي كان باستطاعتها عشان توفر لنا كل شي نبيه سواءً من ناحية المعيشه او التربية او اي شي ثاني
كانت قوية وعلمتنا كيف نكون اقوياء ونعتمد على انفسنا .. لو بدور اكثر كلمة توصفني وافتخر فيها
بقول اني بنت هَيَا :) .
الزبدة p: بسمي هذي السلسلة
We Can Do It
هذي السلسلة مو معناها اني اقلل من احد بس لان للاسف فيه الى الان نساء اذا جو يبون
يشتغلون او يتخصصون في المجال اللي يبونه اكثر كلمة تقابلهم .. ايش تبون بهذا المجال هذي شغلة رجال !!
( لحد ينكر وجود هذي النوعية للاسف الشديد انها موجودة وما يعتبرون من الاقليه )
وممكن تكون انثى تقول هذا الكلام لانثى ثانية !! .. انا هنا صراحة ما اقدر اقول شي غير الله يعينها
على نفسها .. مو معقول انك تشوفين نفسك ناقصة او ان في اي احد احسن منك الانتاجية
مو مختصه بجنس محدد او انهم قادرين عليها هي قدرات وميول ربي حطه في كل انسان واذا
كنت حابب شغلة اكيد راح تبدع فيها .