السلام ..
انا قلت من كم يوم اني راح اسوي شبه سلسله حق فيلم Interstellar ❤❤ الاسئله
اللي جت على بالي يوم طالعته .. اول شي SPOILER ALERT ..
اوك في الفيلم كثير ناقشوا موضوع تمدد الزمن وان الزمن نسبي مثل ماقال
اينشتاين .. في الفيلم يوم ركب البطل الصاروخ كان بنته صغيره وفي نهاية الفيلم جا وبنته
صارت عجوز وكانت تحتضر .. طيب سؤالي هو ايش تمدد الزمن؟ .. وهل هو ممكن؟ ..
المفهوم فيزيائي بحت حاولت قد ما اقدر اني اخفف الكلام المعقد واخليه بصيغه تفهم بسرعه ..
لكن قبل ما ابدأ انا راح اختصر الموضوع قد ما اقدر لو لقيت نفسك حاب تفهم اكثر فنصيحه
ابدأ بالافلام الوثائقيه وبعدين ابحث باللي تبي .. صح انه مفهوم فيزيائي وانا بالبدايه ما بلعته
بس بعدين شفته ممتع .
اوك الموضوع كله ابتدأ يوم طلع العبقري الفيزيائي البرت اينشتاين بالنظرية النسبية
هذي النظرية اللي غيرت كثير بالعالم .. طيب الحين احنا كلنا نعرف الابعاد الثلاثة 3D
اللي هي الطول والعرض والعمق .. وهذي تحدد المكان .. اينشتاين اضاف بعد رابع اللي هو
الزمان .. يختصرون الابعاد الاربعه بالزمكان
الزمكان .. والجاذبية
طيب احنا قلنا من اول ان الزمان والمكان مرتبطين .. من مكان الى اخر
راح تختلف الجاذبية .. كل ما زادت الجاذبية راح يكون الوقت ابطأ وكل ما قلت
الجاذبية راح يكون الوقت اسرع ..
يعني نقول مثلاً انت اخذت ساعه دقيقة جداً وحطيت الساعه فوق عمارة وحطيت
ثانيه تحت .. راح تلاحظ ان الساعة اللي فوق راح تمشي اسرع .. هذا لان الجاذبية اقل
* في الفيلم اظهروا هذي النظرية .. يوم راحو لكوكب ميليرز وكانت الساعة في هذا الكوكب تعادل
٢٣سنه في كوكب الارض .. لو لاحظتوا اول ما دخلوا الكوكب كانوا يواجهون صعوبه في المشي
وقالوا ان السبب ان الجاذبية كانت كبيره (١٣٠٪ زيادة عن كوكب الارض )
السرعة والزمان
اسهل جملة ممكن افكر فيها عشان اشرح الموضوع هو .. ان الوقت مرن يعتمد على
سرعة الشخص .
تفسير اكثر ؟!! .. اوك كلنا نعرف ان سرعة الضوء ثابتة سواءً كنت تتحرك في اتجاهها اوبعيد
عنها .. طيب اذا كنا نشوف ان سرعة الضوء ثابتة هذا يعني ان فيه شي ثاني يتغير اللي هو الزمن
.. اذا كنت اتحرك بسرعة كافية خلال المكان هذا يعني اني اقدر اعدل مساري خلال الزمان
طيب فيه احد قدر يمشي بسرعه تغير فيها مساره خلال الزمان ( سافر للمستقبل ) ؟
اوك هذا احسن جزء .. مثل ما ذكروا في برنامج through the worm hole
( برنامج رهيب ) انه فيه فضائى اسمه سيرغي كريكاليف
كريكاليف يعتبر مسافر عبر الزمن .. ايوه وآله الزمن حقته كانت الصاروخ
قضى ٨٠٣ يوم وهو يمشي بسرعة ٢٧ الف و ٣٥٣ كلم في الساعة .. سيرغي سافر
١ على ٤٨ من الثانية الى المستقبل .
اكيد الوقت مو كثييير بس هذا مثل الامل لنا واثبات في نفس الوقت .. لو زدنا بسرعة اكبر
تكون قريبة من سرعة الضوء .. وقتها لو سافر لمدة سنه راح تكون تقريباً ١٠ سنوات بالنسبة
للارض .. بس هو ما شاخ او جسمه كبر غير سنه هي اللي عاشها .
ــــــــــــــــــــــــ
فيه سؤال قريته وحبيت اجاوب عليه ممكن يكون جا في بال احد منكم
هل يمكن أن أعيش في زمن أحفاد أحفادي وهم لم يأتوا بعد ؟؟
ايوه ممكن جداً تعاصر زمن احفاد احفادك .. لكن انت بتكون في بالهم ان جد جدهم
سافر في مهمه في الفضاء وما بعد رجع .. حاول قد ما تقدر انك تشيل من باللك الافكار
اللي كانت تحطها لنا الافلام واحنا صغار عن سالفه السفر عبر الزمن ( انا اتكلم عن المستقبل بس )
انت ما راح تكون موجود في مكانين في نفس الوقت .. ويوم تسافر للمستقبل راح تشوف نفسك وين صرت ..
انت في مكان واحد اللي هو انك سافرت الى الفضاء
خلاص هذا اخر ما سمعوه عنك .. الموضوع بنظري سهل الاستيعاب ومنطقي انت عشت حياتك
وهم عاشوا حياتهم مو ذنبك ان الوقت في المكان اللي انت فيه كان ابطأ من وقت الارض
بس لو ما جبت عيال قبل ما تسافر .. فا اكيد ما راح تشوف احفاد احفادك يوم ترجع
الموضوع مو سحر!!!!!.
ــــــــــــــــــــــــ
وبس حبيت اصيغ اللي فهمته قد ما اقدر بطريقة سهلة .. اما بالنسبة
للسفر للماضي هذي سالفه طويله راح اكتبها ببوست ثاني ان شاء الله☺
Take Care ❤
مصادر :
ليست هناك تعليقات:
إرسال تعليق