السلام..
في سلسلة وي كان دو ات اليوم راح اتكلم عن حملة اسمها #InspireHerMind
راح اتكلم شوي عن الحملة وبعدين راح اجاوب بعض الاسئلة تاق
عن اهتماماتي بالعلم .
عن اهتماماتي بالعلم .
الحمله "الهم عقلها" هي حملة مخصصة للبنات وتستهدف الوالدين .. في الدعاية حق
هذي الحملة وصلوا فكرتهم بطريقة مررره جميلة .. هي بنت صغيرة في بدايتها في اكتشاف
الحياة من حولها .. مثلاً يوم مشت على البحيرة قالت لها امها انتبهي لا توصخين فستانك ..
ويوم كانت تساعد اخوها تبني نموذج صاروخ وكان معاها دريل ( المشهد اللي بالصورة فوق )
قال لها ابوها اتركيها من يدك وخلي اخوك يسويها .. بكلامهم هذا اثرو على بنتهم وكأن فيها نقص
من انها تبدأ اكتشافاتها فا بعدين البنت يوم كبرت شوي شافت بوستر عن الفضاء وهذي الاشياء لكن
بدال ما تلاحظ الاعلان كانت قاعده تحط قلوس في شفايفها .. هذا الاعلان لو كانت صغيرة كان
راح يشد انتباهها اكيد .. لكن من تأثير الكلمات وعدم تشجيع اهلها لها خلاها تشوف نفسها صورة
وتخلت عن اهتمام ممكن جداً تفيد فيه المجتمع
هذي الحملة كانت في بلد اجنبية فما بالك عندنا .. الشي اللي لاحظوه ان ٦٦٪
من البنات في الصفوف الابتدائية يحبون العلوم والرياضيات لكن بس ١٨٪من المتخصصين في الهندسة
في الكلية هم بنات!! .. مو هذا الوقت اللي لازم تقول لبنتك انها حلوة وذكية بعد !!
هل البنات احسن في انهم يلعبون بيت بيوت او يبنون واحد ؟
التحطيم اكبر شي مدمر لاطفالك سواءً بنات او اولاد .. مهما كانت احلامهم مجنونة دايم
قلهم ليش لا .. شجع اهتماماتهم مهما كانت اهتمامات علمية او فاشن او ادب .. لا تجبرهم على
شي حتى الموضوع يجي بالعكس اذا اطفالك مالهم اهتمامات علميه لا تجبرهم عليها .. لا تجبرهم
على احلام انت ما قدرت تسويها بنفسك .
Inspire Her Mind Tag !!
( هذا التاق شفته في اليوتيوب فقلت خليني احط اسألته هنا واجاوبها )
١. فيزياء، كيمياء او احياء ؟
- طيب خلينا من البداية نقط الاحياء في الزبالة :p .. ما عمري بلعتها ك مادة عموماً انا عن نفسي
في الدراسة ما احب الاشياء اللي تحفظ احب افهم مع اني اقضي وقت اطول في مواد الفهم من الحفظ
لان الفهم يبيله تركيز لكن يظل عندي الفهم احسن لاني على الاقل احس بشويه استمتاع وانا اذاكره
(طبعاً ما فيه داعي اوضح اني ما اطيق المذاكرة ) .. اوك الحين احنا بين الفيزياء والكيمياء من زمان وانا احب
الكيمياء تخلطين كميه محدده من شي على شي تتفاعل ويكون لك شي اخر !! الفكرة تونس والمعامل ساحرة
بالنسبة لي .. اما الفيزياء احسه جمييل جداً لكن مناهجنا ظالمته ومخليته غثيث اذكر اول ما درسنا النظرية النسبية
كانت بالنسبة لي شي مستحيل الفهم وفلسفي لكن بعد ما بحثت عنها عشان اكتب تدوينة انترستيلر هنا فهمتها
بسرعة وبشكل مبسط ولا الطلاسم اللي كانت بالكتب .. احسن جزء فيزياء عندي هو فيزياء الكهرباء .
اجابة قصيرة : فيزياء ولكن الكيمياء دايم خياري الثاني وممكن يوم من الايام تكون الاول
٢. علمينا جملة في لغة اخرى .
امممم صراحة انا مو كثيير مع اللغات انجلش ويالله ادف نفسي :p .. لكن اذكر
شغالتنا الاندونيسية كانت تقول لنا .. "كاموا ايو" يعني انتي حلوة عاد علقت بمخي .
٣. عمرك احترفتي رياضة ؟
احتراف لا .. عموماً انا في السعودية مسألة الرياضة قليلة جداً .. وانا صغيرة
كنت اعرف اسبح بس يوم كبرت نسيت كل شي بس اعرف اطفو
٤. ايش كانت مادتك المفضلة في المدرسة ؟
هنا عاد نمر بمراحل
في الابتدائي كنت احب حصة الفنية بشكل وكنت انا البنت اللي دايم يجونها ويقولون لها
ممكن تعلميني .. لكن بعدين جت استاذة وكرهتني بام المادة :/ .
المتوسط كنت احب الرياضيات لكن عموماً ما كنت اشد حيلي بالدراسة
الثانوي .. ضليت احب الرياضيات لكن حبيت الكيمياء بشكل .. خاصة اول ثانوي جتنا معلمة مرره
شديدة بالدراسة وكانت في الاجازة تعطينا تأكسد العناصر عشان نحفظها ولازم نحفظ الرمز حق كل عنصر
كنا كثيير نشتكي منها بس بعدين تفاجأنا بدرجاتنا وبعدين مرت علينا السنتين الباقين بكل سهولة لاننا
تأسسنا صح ( مع اني اتوقع انه هذي المعلومات كان لازم يعطوناها بوقت ابكر ) .. ثالث ثانوي
بديت احب الفيزياء فصرت احب كل المواد العلمية .
اجابة قصيرة : كل المواد العلمية لكن للرياضيات معزه خاصة
٥. ايش هو الكتاب اللي تنصحين احد يقراه في هذي اللحظة ؟
اقول لكم شي ما احب الكتب!! .. بالنسبة لي الكتب تجيب لك المعلومة .. اوك صح كلنا نتفق
على هذي النقطة لكن احنا في القرن الواحد والعشرين الكتب ما صارت المصدر الوحيد للمعلومات
الكتب ممله شوي (تماطل) وانا صراحة احب اخذ الزبدة استبدلها بالافلام الوثائقية مصادر موثوقة
وغذاء للعقل وللبصر او القوقل .
انا ممكن اقرا روايات واخلصها للنهايه احب اقرا روايات الغموض والتحقيق لاني احب هذي الخرابيط
واحب اقرا روايات رومانسية لاني بنت :p .. بشرط ان هذي الروايات ما تتعدى الميتين صفحه ( طرارة وتتشرط) .
اجابة قصيرة : روايات دان براون لكن بالنسبة لي ما اخلصها للنهاية لانها طويلة واطالع الفيلم :p
٦. ايش هي الاماكن اللي ودك تسافرين لها في العالم ؟
ودي اروح لاماكن غريبة بعيدة عن المدينة اجرب فيها اشياء جديدة وثقافة غريبة
وعادي جداً اقضي عطلتي كلها في متاحف .. اما للريلاكسنق ودي اروح جزر الكاريبي
(تأثير pirates of the caribbean ) .
تعرفون انه لو قلتوا لي تروحين للندن ( محبوبة الخليج ) او نيجيريا مثلاً .. عن نفسي
راح اختار نيجيريا .. منها اتعلم حضارة جديدة وكيف ناس عايشة بفقر ممكن هذي الرحلة تغير فيني
كثيير .. وغير كذا اتجنب اشوف خليجيين يستعرضون بثروتهم بكل غباء ويحولون رحلة سياحة الى
show مالي خلق يرتفع ضغطي :/ .
٧. عندك شي تعتبرينه كنز مدفون ؟
ادري السالفة بتبين غبية لكن فيه كوفي على كورنيش الخبر اسمه لي تراس هذا الكافيه
يكون فوق سطح عمارة وبابه خلفي عموماً كل ما ادخل هذا الكوفي احسن داخلة مغارة علي بابا
السر اللي ما يعرفه احد .. مع اني متأكدة ان كل اهل الخبر يعرفونه حتى اللي مو من الخبر بعد :p
عاد مو من زين اكلهم لكن الفيو حلو .
٨. عندك فكرة لاختراع معين ؟
صراحة للاسف انا ما ادون افكاري فغالباً انساهم .. بس اللي اذكرة الحين ودي يكون فيه
كرسي تقعد فيه وهو يقوم يحرك كل عضلة بجسمك هذا الكرسي ما راح تبذل مجهود تمارين
شد هو راح يسوي كل شي وانت قاعد :p
( طبعاً من هذي الفكرة راح يبين لكم قد ايش انا كسولة )
٩. من يلهمك ؟
ما ادري كثيير ناس لكن الهامي او مثل الشخص اللي اعتبره قدوة لي هو امي الله يرحمها
ما ابي امشي بخطواتها لا .. اصلاً ما ابي امشي بخطوات احد لكن في الايدول حقي
ــــــــــــــــــــــــــــــــــــــــــــــــــــــــــــــــــــــــــــ
وبس اتمنى انكم حبيتوا التدوينة مع اني هذرت كثيير
اللي يبي يسوي التاق .. ياليت يحط تدوينته بالكومنت
او حتى اذا ما عنده مدونه يجاوب بالكومنت .. ودي اقرا عن
اهتماماتكم
Take Care
١. فيزياء، كيمياء او احياء ؟
٢. علمنا جملة في لغة اخرى .
٣. عمرك احترفت رياضة ؟
٤. ايش كانت مادتك المفضلة في المدرسة ؟
٥. ايش هو الكتاب اللي تنصح احد يقراه في هذي اللحظة ؟
٦. ايش هي الاماكن اللي ودك تسافر لها في العالم ؟
٧. عندك شي تعتبره كنز مدفون ؟
٨. عندك فكرة لاختراع معين ؟
٩. من يلهمك ؟
ليست هناك تعليقات:
إرسال تعليق